برمج عقلك الحلقات الكاملة للدكتور شريف عرفهالجزء الاول

انا امبارح قريت مقالات برمج عقلك
للدكتور شريف عرفهأنا بقه الموضوع شدنى ومهداليش بال غير لما جمعتهم كلهم
وقلت أنزلها عشان يستفادوا بيهم


بتكلم نفســك أزاي؟؟؟

هل تعلم.. إننا كلنا بنكلم نفسنا؟؟
طبعا مش قصدي نقف قدام المراية نكلم نفسنا زي في الرسمة كده.. باهزر طبعا..
لكن أقصد الحوار اللي بيحصل بينك وبين نفسك وإنت قافل بقك.. فاهم حاجة؟؟

تعالوا نخش في الموضوع..

لم تأتِ خطيبة "زكي" لزيارته في عمله كالعادة.. وكلمها على الموبايل فوجده مغلقا.. فدارت في ذهنه هذه الأفكار:

لماذا لم تأتِ؟!
أكيد متضايقه مني!
متضايقة ليه؟
أكيد لا تحترمني ولا أمثل لها أي أهمية!
لماذا أغلقت هاتفها؟
لأنها لا تبالي بي ولا تريد أن أكلمها لأنني أسبب لها إزعاجا!
إنها لا تحبني!
أنا لا أمثل لها أية أهمية!
حسنا.. أنا أكرهها ولن أتصل بها!!
وسأتشاجر معها كذلك!!

هل لاحظت تسلسل الأفكار التي جالت بخاطره؟؟
لم يحدث أي حوار فعلي بينه وبين خطيبته لتخبره بسبب تأخرها.. تسلسل أفكاره قاده لافتراضات معينة لا ذنب لها فيها أصلا!!

من الممكن أن تكون قد تأخرت لأنها تحضر له مفاجأة، وهاتفها مغلق لأن بطاريته قد نفدت.. ممكن طبعا!!


إيه اللي حصل هنا؟
اللي حصل حاجة اسمها: الحوار الداخلي..

الحوار الداخلي

هو الحوار الذي يدور في ذهن كل منا.. قد نتخيل أننا نكلم شخصا ما ونفترض أنه سيجيب بطريقة معينة قد تؤثر على حكمنا عليه.. أو أننا نجري حوارا بيننا و بين أنفسنا نفترض فيه افتراضات سلبية أو إيجابية.

احذر الحوار الداخلي السلبي، واحذر تأثيره..

حين نتخيل حوارا مع شخص.. فهذا الحوار الوهمي قد يؤثر في حكمنا عليه فعلا.. لذلك حاول أن تفهم الشخص ذاته ولا تفترض فيه افتراضات مسبقة.. ولا تفترض دائما الأسوأ في أي موقف..



اقرأ معي هذا الخبر الغريب:
رجل يقتل زوجته لأنها رفضت السهر!

خبر مرعب طبعا.. لكن لو دققنا النظر سنجد أن السبب الرئيسي لهذه الجريمة ليس رفض الزوجة السهر.. لكن الحوار الداخلي للزوج (الذي يعاني مشكلة نفسية غالبا) هو السبب الرئيسي لما حدث..

ما الحوار الداخلي السلبي الذي دار في ذهنه مثلا؟

لم لا تسهر معي؟
لأنها لا تحترمني..
ألا تعرف أنني رجل البيت هنا؟؟
ألا تقدر ما أفعله من أجلها؟
تصرفها هذا يعني إهانة لرجولتي..
يجب أن أثأر لكرامتي...


في هذا الحوار السلبي افترض أنها أهانت رجولته فأخرج السكين وطعنها (بما أنه يعاني مشكلة نفسية غالبا).. ربما لم تقصد بهذا إهانة رجولته لكن قصدت بهذا الراحة بعد يوم عمل شاق مثلا!!

احذر الحوار الداخلي السلبي.. تعلم كيف تتوقع الأفضل دائما.. اجعل حوارك الداخلي إيجابيا لا سلبيا كي تعيش سعيدا.. هذا هو مفتاح سعادتك مع الناس..



طيب.. ما الحوار الداخلي الإيجابي بقى؟؟

قول إنت بقى.. الدور عليك..

المثالين اللي فاتوا كتبنا مع بعض حوار داخلي سلبي لكل منهما.. اكتب إنت الإيجابي..



لم تأتِ خطيبة "زكي" لزيارته في عمله كالعادة.. وكلمها على الموبايل فوجده مغلقا.. فدارت في ذهنه هذه الأفكار الإيجابية:

حين تأخرت اليوم افتقدتها.. إنني أحبها فعلا..
بالتأكيد تأخرت لأنها تحضر لي خبرا سارا..




أكمل أنت بقية هذا الحوار
لتدرب نفسك على الحوار الداخلي الإيجابي
.....................................
.....................................
.....................................
.....................................
.....................................


رجل عاد للبيت متأخرا فوجد زوجته ترفض السهر..
سيدور في ذهنه هذا الحوار الإيجابي:

لقد أرهقت نفسها اليوم كثيرا من أجلي لأنها تحبني..
لن أجبرها على السهر كي تعرف كم أحبها...



أكمل أنت بقية هذا الحوار
لتدرب نفسك على الحوار الداخلي الإيجابي

.............................
.............................
.............................
.............................

مارس هذا التدريب في كل موقف يمر عليك في حياتك.. تعلم كيف تفترض افتراضات إيجابية تفسر أي موقف يمر عليك.. هل تعلم أن (80 %) من أسباب القلق سببها طريقة تفكيرنا السلبية ولا علاقة لها بما يحدث فعلا؟؟

اجعل كلامك مع نفسك إيجابيا ولاحظ الفرق الذي سيصنعه ذلك لحياتك ولنظرتك للأشياء...



حقــــــــــــق هــــــــدفــــــــك (1)!!

هل محدد أهدافك؟
هل تعرف بالضبط إنت عايز تعمل إيه؟

هل ماشي في طريقك ومش بتحود يمين أو شمال؟


مسألة تحقيق الأهداف دي من المسائل اللي اتكتب فيها كلام كتير واللي تهم كل واحد مننا طبعا..
عشان كده قلت إننا لازم ندردش حواليها شوية..


الموضوع ده ينقسم لقسمين..
أولا: اكتشاف الأهداف نفسها..
ثانيا: العمل على تحقيقها..


هنتكلم المرة دي عن اكتشاف أهدافك


أولا: اكتشف أهدافك


ماينفعش نحقق أهدافنا واحنا مش عارفين هي إيه أساسا.. عشان كده لازم نركز في معرفة أهدافنا الأول..


فيه كذا طريقة ممكن بيها نعرف أهدافنا.. هاديلك هنا أبسطها..
الموضوع ده ممكن ياخد كذا يوم.. ماتستعجلش يعني

في اليوم الأول:
جيب ورقة فاضية واكتب فيها كل اللي نفسك فيه.. كل أهدافك وأحلامك..
ماتحطش أي قيود.. وسيبك من اللي يقول لك: "احلم على قدك" عشان الجملة دي بتاعة الناس الفاشلين في حياتهم.. وهتحد من قدراتك وتطلعاتك..
وبعدين انسَ الورقة دي النهارده.. كمل يومك عادي وارجع لها يوم تاني..

في اليوم الثاني:
ارجع للورقة واقرا الأهداف اللي كتبتها.. هتلاقي إن فيه حاجات مالهاش لازمة أو مش مهتم بيها قوي.. اشطبها أو عدلها.. اتأمل الورقة شوية وبعدين سيبها.. ارجع ليها بعدين!!


في اليوم الثالث:
بص في الورقة بتاعة أهدافك.. كلها حاجات مش بطالة، مش كده؟؟
ابتدي بقى رتب الأهم فالأهم.. رتبها حسب أهميتها ليك ولحياتك.. والغي أي حاجة مالهاش لازمة لو لقيت..

بص في الورقة كويس.. وبعدين سيبها وارجع ليها بعدين!!


في اليوم الرابع:

ارجع لورقتك.. حدد أهم أهداف من اللي إنت حاططها في الأول وحاسس بأهميتها..
خد لك هدفين أو تلاته تبتدي بيهم... وبعدين اكتب:
1- ما الأسباب اللي خلت ده هدفك؟
2- ما النتائج الرائعة التي ستحصل عليها إذا حققت هذا الهدف؟

اكتب في كل نقطة على الأقل خمسة أسباب.. اكتب عشرة, عشرين لو عايز.. اكتب على قد ما تقدر..

السؤالين دول لما تجاوب فيهم كتير عارف بيعملوا إيه؟

بيزودوا عندك الرغبة في تحقيق الهدف.. لأنهم بيساعدوك على تخيله والتركيز على فوايده في حياتك.. بتبرمج عقلك اللاواعي على أهمية الهدف ده والسعي إليه..
الرغبة الحقيقية دي هي أول خطوة فعلية في تحقيق هدفك..

دي إحدى الطرق البسيطة اللي ممكن تحدد بيها أهدافك.. فيه طرق تانية طبعا هنبقى نقولها (ورانا حاجة؟) لكن خلينا في دي..

في العدد ده عملنا خطوتين مهمين:
تحديد الهدف.
غرس الرغبة في تحقيق الهدف.



حقـــــــــــــق هدفــــــــك (2)!!



هل حددت أهدافك في الحلقة اللي فاتت؟
هل عرفت فعلا إنت عايز تعمل إيه ورتبت أهدافك حسب الأهمية؟

تعالَ بقى نخش في الموضوع:

كيف تحقق هدفك اللي حددته؟؟

في الأول تعالَ نتكلم عن أنواع الأهداف..

أولا: أهداف طويلة المدى:
زي: عايز أكون دكتور – عايز أطلع ضابط – عايز أكون مليونير....
ودي بتاخد وقت كتير عشان تتحقق..

ثانيا: أهداف متوسطة المدى:
عايز آخد الدورة الفلانية – عايز أسافر...
ودي بتاخد وقت أقل شوية عشان تتحقق..

ثالثا: أهداف قصيرة المدى:
زي: عايز أشتري بنطلون - عايز أزور فلان...
وده بيحتاج خطوات بسيطة وممكن يتحقق في فترة قصيرة..


وإليك كيفية تحقيق أهدافك:

1-وضع إطار زمني:

عشان تبتدي تحقق أهدافك لازم تعرف نوعها.. هل هي طويلة أم قصيرة أم متوسطة لوضع إطار زمني لتحقيقها.. ماتسيبيهاش مفتوحة.. حط تاريخ محدد باليوم والشهر لتحقيق الهدف..

2- تقسيم الهدف:

لو كان هدفك طويل المدى قسمه لأهداف قصيرة أو متوسطة.. وحط لكل واحد منها إطار زمني لتحقيقه.. خلّي بالك دي أهم نقطة.. لو ماحددتش وقت معين لتحقيق أهدافك هتطنش عليه خالص وتنساه..



الهدف طويل المدى: أكون دكتور..

يتقسم لأهداف:

متوسطة: أعمل جدول مذاكرة لكل أسبوع - أذاكر وأجيب مجموع لا يقل عن 98 %.
قصيرة: لازم أخلص الفصل الخامس النهارده عشان أراجعه بكره تاني.

3 – أسلوب الخطوة:

ماتسمحش لنفسك تنام بالليل مستريح, لو في اليوم ده مامشتش خطوة (ولو بسيطة) تقربك من هدفك.. كل يوم لازم تكون قربت من هدفك ولو خطوة واحدة..



الهدف: أتعلم فرنساوي..
الخطوات:

أسأل عن المراكز اللي بتدرسه (خطوة)
أعرف مكانها (خطوة)
أسأل عن أسعارها (خطوة)
وبكده هتلاقي نفسك بتقرب من هدفك واحدة واحدة لحد ما في النهاية تلاقي إنه اتحقق...

4- التقييم:

بعد ما تمشي في الخطوات السابقة بتاعتك.. بص على النتائج اللي حققتها وقيم نفسك.. هل إنت ماشي لطريقك بمعدل كويس؟ هل ممكن تكون أسرع من كده؟ هل إنت راضي عن أسلوبك؟
هل فيه طريقة أحسن من دي تقربك من الهدف؟

قيم نفسك كل فترة (كل أسبوع مثلا) وشوف إنت عملت إيه وقربت لهدفك قد إيه..
لو راضي عن أدائك: كمل وربنا معاك يا بطل..
لو مش راضي عن أدائك: اعرف الخلل فين بالضبط.. هل عدم التزام منك؟ هل أسلوبك غلط؟ هل فيه طرق أحسن؟ عدل اللي إنت عايزه وارجع تاني كمل مشوارك...

5 – الفعل:

لازم تنفذ كل الخطوات السابقة بالتزام تام.. لازم تعمل مش مجرد إنك تفكر في الخطوات دي وماتعملش بيها.. قرر وإنت قادر إنك تبدأ تحقق حلمك.. لو بدأت فعلا تمشي ناحيته..

6 – الإيمان:

مافيش حاجة اسمها الظروف.. كل العقبات اللي هتواجهك دي لازم تلاقيها لو إنت ماشي في طريقك صح.. لو مافيش أي عقبات يبقى مش هتحقق أي حاجة... كل ما تقاوم الظروف أكتر, كل ما نجاحك هيكون أروع وأفضل.. وطول ما إنت مع ربنا هينصرك لأنه فوق كل الظروف وكل العقبات.. لو هو معاك هيوصلك لأي هدف لأنه فوق الأسباب...

7- تصرف وكأنك حققت هدفك فعلا:

تخيل دايما نفسك وإنت عايش حلمك.. وعيش الحلم ده فعلا.. حس إنك حققته فعلا واتصرف على هذا الأساس.. تخيل مثلك الأعلى وهو محقق الحلم ده.. وراقبه... بيتكلم ازاي؟ بيفكر ازاي؟ بيتصرف ازاي؟ بيلبس إيه؟ اعمل زيه –من الآن– في كل الحاجات اللي اتقالت دي..

تخيلك ده هو اللي هيبرمج عقلك اللاواعي عشان يوصلك لهدفك اللي إنت بدأت تعيشه فعلا..

وألف مبروك يا شباب على تحقيق أهدافكم..

أيـــــه نظـــــــامك 1


سؤال:

عمرك حسيت إن اللي قدامك مش فاهمك كويس؟؟
عمرك لاحظت إنك مش قادر تقنع اللي قدامك بوجهة نظرك؟؟
المشكلة دي بتواجهنا كلنا...

ساعات بتلاحظ إنك بتكلم حد في موضوع وهو مش قادر يوصل للفكرة اللي إنت عايز تقولها.. صح؟

عارف ليه؟

طيب قبل ما نجاوب السؤال ده هنلعب مع بعض لعبة صغيرة!


هاسألك كام سؤال.. أوك؟؟

(أهم حاجة في الموضوع هنا إنك تجاوب الأسئلة دي عشان هتحتاجها بعدين.. ما ينفعش تكمل قراءة من غير ما تجاوب عشان تستفيد من الموضوع ده....يللا قوم هات ورقة وأكتبهم)

فكر في أي صديق ييجي في بالك حالاً... اتكلم عنه في 3 أسطر على الأقل
اوصف المكان اللي إنت قاعد فيه دلوقتي... في 3 أسطر على الأقل
تخيل نفسك بعد 10 سنين من دلوقت في موقف معين.. اوصف الموقف اللي إنت متخيله ده بالتفصيل الممل

.................................................. ......
.................................................. ......
.................................................. ......

.................................................. ......
.................................................. ......
.................................................. ......

.................................................. ......
.................................................. ......
.................................................. ......



خلصت اللعبة؟؟ يلا بقى نعرف إيه الحكاية...

الأنظمة التمثيلية:

مخ الإنسان يا عزيزي عبارة عن أرشيف بيخزن كل المعلومات اللي الواحد مننا بياخدها في حياته, ويسترجعها وقت الحاجة.

اكتشف العلماء إن الأرشيف ده كذا نوع... مش نوع واحد...


وطبقاً للنوع ده بيتقسم الناس لثلاث (أنظمة تمثيلية) رئيسية:

1-شخص بصري

2-شخص سمعــي


3-شخص حسي (شعوري)


يعني إيه الكلام ده؟؟ بص معايا على الجدول ده:

النوع وطريقة عمل المخ


سمات شخصيةالبصر
يبيخزن المعلومات على شكل صور وأشكال.. ذكرياته وتفكيره عبارة عن صور.

بيتذوق الفن التشكيلي - أنيق - سريع الحركة والكلام واتخاذ القرار.


سمعي
بيخزن المعلومات كأصوات - بيفتكر الأصوات والكلام اللي اتقال في موقف ما أكثر من أي حاجة تانية.

يتذوق الموسيقى - يميل إلى العقلانية وتحليل الأمور - غير متسرع.


حسي (شعوري)

بيخزن المعلومات كمشاعر وأحاسيس - ممكن مايفتكرش من موقف ما غير الأحاسيس والمشاعر اللي كانت عنده وقتها

منخفض الصوت - بطيء الكلام - تتخلله فترات صمت - قراراته تتحدد طبقاً لمشاعره - لا يهتم بالمظهر..





راجع إجاباتك اللي فاتت (مش قلت لك مهمة؟) عشان تعرف نظامك التمثيلي:

اتكلم عن صديق جه على بالك:
.................................................. ...
.................................................. ...
.................................................. ...


لو كنت بصري: هتوصف شكله ومظهره.. طويل - قصير - ملامحه...

لو كنت سمعي: هتوصف طريقة كلامه وصوته عالي ولا منخفض وتقيمه تقيم عقلي (تفكيره كويس - لاسع....)

لو كنت شعوري: هتوصف أحاسيسك وشعورك ناحيته.. (مريح- باكره- باحب..)


اوصف المكان اللي إنت قاعد فيه:
...............................................
...............................................
...............................................

لو كنت بصري: هتوصف الديكور والألوان والأشياء اللي حواليك

لو كنت سمعي: هتوصف الأصوات (ضوضاء - هادئ....)

لو كنت شعوري: هتوصف أحاسيسك ومشاعرك (مكان مريح - الكرسي ناشف..)


- تخيل نفسك بعد 10 سنين..
.................................................. ......
.................................................. ......
.................................................. ......

لو كنت بصري: هتوصف شكل المكان أو الناس اللي حواليك.

لو كنت سمعي: هتوصف الأصوات والكلام اللي بيتقال.

لو كنت شعوري: هتوصف مشاعرك في هذه اللحظة..


عرفت بقى نظامك التمثيلي؟؟

أحياناً الإنسان له أكثر من نظام... يعني (سمعي- بصري) أو (شعوري- سمعي) كده يعني.. وممكن تتغير الأنظمة من وقت للتاني ومن سن للتاني...

اسألهم أسئلة من عينة (احكي لي الموقف الفلاني...) ولاحظ هيوصف أشكال ولا أصوات ولا أحاسيس... جرب وأكتب رد .. وياريت تقول لنا عملت إيه....

طيب والكلام ده مفيد في إيه؟؟
عايز تعرف؟؟



إيه النظام؟2

دلوقتي وبعد ما عرفنا نظامنا التمثيلي ونظام الناس اللي بنتعامل معاهم (راجع الحلقة اللي فاتت) هنستفيد من الكلام ده كله بإيه؟؟


هاقول لك مثال:

لو بتتنافس مع واحد تعرفه حول موضوع معين...

لو شخص بصري:
هتلاقيه يستخدم كلمات(بصرية) زي:
"شايف وجهة نظري؟.. بص للموضوع من الزاوية دي.. شكله كويس..."

لو شخص سمعي:
هتلاقيه يستخدم كلمات (سمعية) زي:
" اسمع.. ركز.. نشاز....."
عارف ليه؟ لأنه (سامع) الفكرة في مخه, وبيحاول يقول لك التحليل المنطقي ليها...

لو شخص شعوري:
هتلاقيه بيستخدم كلمات (شعورية) زي:
"مش مستريح للموضوع ده...."
عارف ليه؟ لأنه (حاسس) بالفكرة, وبيحاول ينقل لك مشاعره ناحيتها....

فهمت بقى الفولة؟؟

يبقى لو عايز تقنع واحد بصري بحاجة: حاول ترسم له الصورة بتاعتها وبتعبيرات بصرية....
لو سمعي: اقنعه بالمنطق وبتعبيرات سمعية...
لو شعوري: اقنعه بالمشاعر والأحاسيس بتعبيرات حسية...

لعبة

تمرين 1:

عاوز تقنع واحد إنه يروح معاك السينما... هتقول له إيه؟...


لو بصري؟
............................
............................
............................

لو هو سمعي؟
............................
............................
............................

لو هو شعوري؟
............................
............................
............................


برافو عليك.... أيوه كده....
(راجع جدول الحلقة اللي فاتت)


قبل ما نختم الحلقة, تعالوا نتفرج على الأمثلة دي ونحاول نفكر فيها مع بعض:
مثال:

فرغلي:

"مراتي مش بتحبني... اشتريت لها غسالة فول أتوماتيك بدل الغسالة اللى صوتها عالي اللي عندنا وصرفت نص المرتب.... وبرضه مش مبسوطة....".


التفسير:

فرغلي (سمعي) يعتبر الغسالة هدية قيمة, بينما زوجته (شعورية) مش عايزة منه غير وردة أو كلمة حلوة في عيد جوازهم...

كمان مثال:



عنايات:
"جوزي مش طايقني.. كل ما أكلمه يبص الناحية التانية.. سامع كل كلمة باقولها بس مش عايز يبص في وشي".


التفسير:

عنايات (بصرية) تعتبر النظر شيئا مهما للتعبير عن الحب.. وجوزها سمعي بيركز عن طريق ودانه...


كمان مثال:

تامر:

"بصوا يا جدعان أنا مش طايق "ميدو" ده ممل قوي وعلى ما يقول كلمتين على بعض باكون نمت..."

التفسير:

تامر (بصري) بيتكلم بسرعة, وميدو (شعوري) بيتكلم ببطء
(راجع جدول الحلقة اللي فاتت)




المصــــــــــــــــافي...




أهلا بيكم في حلقة جديدة من برمج عقلك...
المصافي!!
هو: ماحدش بيحبني خالص..!
هو: على فكرة "محمود" مش جدع..!
هي: بقالي أسبوعين مابانامش!


شايف المشاكل دي؟ عارف إيه حلها؟ تعال نقرا الموضوع وهتحلها إنت بنفسك بكل بساطة..

دلوقتي وبعد ما عرفنا إيه هي (أنظمة الناس) في الحلقات اللي فاتت.. هنعرف النهارده حاجة مهمة قوي.. و هي:

المصفاة!!

عارف المصفاة؟؟
أيوه بالضبط.. اللي بتصفي بيها عصير الليمون..




المصفاة دي 3 أنواع:
مصفاة الحذف
مصفاة التعميم
مصفاة التحريف



1ـ مصفاة الحذف:

المصفاة دي بتاخد المعلومات اللي جت لها وتحذف منها شوية.. بتعدي حاجات وماتعديش حاجات..




إنت قاعد دلوقتي أمام جهاز الكمبيوتر بتقرا الموضوع ده ومركز فيه.. وفي نفس الوقت فيه مؤثرات كتيييرة جدا حواليك.. فيه أصوات كتير حواليك صح؟ ركز كده.. لكن إنت ماكنتش منتبه للأصوات دي ومركز في القراءة.. صح؟

أهي المصفاة دي دورها كده.. بتلغي شوية مؤثرات وتسيب غيرها.. المعلومات اللي رايحة في طريقها للمخ المصفاة مش بتسيبها تعدي في حالها.. بتلغي شوية حاجات..



2ـ مصفاة التعميم:

المصفاه دي بقى على العكس.. بتاخد شوية معلومات وتكبرها وتحسسك إن هي دي بس المعلومات الموجودة.. يعني عممت المعلومات دي على التجربة كلها.




فكر في حد إنت مش بتحبه خالص أو مش بتستلطفه مطلقا.. فكرت فيه؟..
اكتب هنا أهم صفاتهأكتب بجد متطنش)
..................................................
..................................................
..................................................



شفت؟ هو ده بقى التعميم.. كل بني آدم فيه ملايين الصفات الكويسة والوحشة.. لكن إنت عشان مش بتحب الشخص ده, وصفته بصفة سلبية.. رغم إن فيه صفات إيجابية كتير..

مصفاة التعميم خلت الصفة السلبية دي هي اللي تتعمم.. رغم إن أكيد فيه صفات كويسة كتير، المصفاة دي ما خلتهاش تعدي لمخك (الخريطة).


هي: " كل الرجال قاسيين .."
ده مثال تاني للتعميم.. صاحبة الجملة دي أكيد مرت بتجربة مع واحد قاسي, خلتها تعمم الموضوع على كل الرجال.. مع إن ده مش صحيح...

3ـ مصفاة التحريف:

المصفاة دي غير اللي فاتوا خالص.. لأنها ببساطة بتحرف المعلومات اللي رايحة المخ ..




لي واحد صاحبي بيحب واحدة زميلتنا جدا, وهي مش في دماغها أصلا.. وفي يوم من الأيام كانت ماشية قدامنا وقالت: "صباح الخير!".. عادي يعني! صاحبنا ده قال إن ده دليل إنها بتحبه وإنها تعمدت تعدي قدامنا وتقول كده عشان تشوفه!! .. الغريب إنه كان مصدق كده تماما..

السبب في كده: مصفاة التحريف.. خلت الموقف العادي ده يتحرف ويبقى حاجة تانية خالص..

طيب.. أي نوع من دول عندنا؟؟
صح.. التلاتة طبعا.. كل مصفاة في وقتها بطريقة لا إرادية...


التحكم في المصافي:
دلوقتي بعد ما فهمنا أنواع المصافي دي وازاي بتشتغل, نقدر بكل بساطة نتحكم فيها عشان نعيش حياة أسعد..

تعال نشوف المشاكل دي كده:


مشكلة 1:

هو: مراتي رغاية أوي وبتتكلم كتيييييييييير



مشكلة 2:

هي: جوزي عمره ما يحط حاجة في مكانها خالص!!

خدت بالك من المشاكل دي؟؟

فكر كده في الفلاتر اللي استخدمت في كل حالة

المشكلة 1:
الزوج استخدم مصفاة ( التعميم والإلغاء)

ركز في مشكــلة الكلام الكتير لزوجته (تعميم) وتــجاهل حاجات كتــير قـــوي ممكن تكون كويسة فيها (إلغاء).

عارفين الحل إيه؟
يستخدم الإلغاء في موضوع الكلام الكتير ويعمم في أي صفة حلوة عندها..
يركز في إن مراته منظمة مثلا.. في إنها بتحبه.. في إنها بتربي عياله كويس وبتخلي بالها من بيته.. كده يعني..
كل ماتتكلم كتير قدامه يركز كم هي حنونة وجميلة وتحملت معي الكثير.. وبكده هيعدي الموضوع!



المشكلة 2:
الزوجة استخدمت مصفاة (التعميم والإلغاء والتحريف).

مصفاة التحريف: يعني معقول عمره ما حط حاجة في مكانها؟؟ ليه يعني؟؟ دايما بيحط الأكل في الدولاب والقمصان في التلاجة مثلا؟؟ عمره ما حط دماغه على المخدة يعني ولا بيحطها على الكومودينو دايما؟؟ أكيد منظم إلى حد ما في بعض الأشياء..

لو شغلت مصفاة (التعميم) في المواقف اللي كان فيها منظم.. هتلاقي إنه مش بشع إلى هذا الحد!!
وبكده على الأقل هتقدّر حجم المشكلة بالضبط وتقدر تتفاهم معاه وتعلمه النظام في الحاجات القليلة اللي هو غير منظم فيها..

ودلوقتي وبعد ما حلينا المشكلتين دول.. ارجع للمشاكل اللي في أول الموضوع هتلاقي نفسك حليتها لوحدك..

جرب كده وابعت لنا الحلول

بتحكمك في المصافي بتاعتك هتقدر تحب (شريك حياتك- عملك- أهلك أكتر وأكتر) (بتعميم) صفاته الكويسة و(إلغاء) صفاته اللي مش عاجباك.. و(حرّف) زي ما إنت عايز.. بس وإنت بتستخدم المصافي دي اعرف إن الهدف الأساسي هو: إنك تعيش حياة أسعد, بعيدة عن الضغوط...
ورحلة حياة سعيدة..

هو ده بقى موضوع المصافي (علميا اسمها: الفلاتر).

بعد ما المعلومات بتعدي من المصافي دي, بتروح على المخ.. اللي هو الخريطة..

الخريــــــــطة!!

إيه هي الخريطة دي؟؟

هو ده اللي هنتكلم عنه في الحلقة الجاية..
فإلى اللقاء.





النهاردة هنتكلم عن موضوع مهم قوي في حلقتين..
حلقة النهارده هي: خريطتنا،
والحلقة الجاية: خريطة الناس التانية!!


مش فاهم حاجة؟ ولا يهمك.. تعال نخش في الموضوع...


هاحكي ليك قصة صغيرة:


مرة واحد كان مسافر (شرم الشيخ) بالسيارة.. وعشان الطريق طويل أخد معاه خريطة... الراجل فضل ماشي ماشي ماشي.. وكل مرة بيضل طريقه ومش عارف يوصل..

عارف طلع السبب إيه؟
طلع ماسك خريطة (الإسكندرية) مش (شرم الشيخ)!!


الراجل وقف وطلع خريطة تانية واتأكد إنها خريطة (شرم الشيخ).. وفضل ماشي ماشي ماشي.. وبرضه تاه..

عارف طلع السبب إيه؟
طلعت خريطة قديمة, والطريق حصل فيه تغييرات وتجديدات كتير!!


الراجل وقف وأخرج خريطة جديدة اتأكد إنها خريطة (شرم الشيخ) وبتاريخ السنة دي.. وفضل ماشي ماشي ماشي.. تخيلوا حصل إيه؟؟ برضه تاه...


طلع السبب إيه؟؟
كان ماسك الخريطة بالمقلوب!!!



عايز أقول إيه؟؟
عايز أقول إن عشان ماتضلش طريقك, لازم تكون معاك الخريطة الصحيحة..

لكن.. إيه هي الخريطة دي؟؟

الخريطة دي عبارة عن مجموعة الخبرات اللي الواحد خدها في حياته كلها.. واللي بتخليه شايف العالم بطريقة مختلفة عن غيره..

هاسألك سؤالين هيوضحوا ليك الموضوع:


السؤال الأول: دبلة الخطوبة.. بتمثل لك إيه؟؟

السؤال الثاني: دكتور الأسنان.. بيمثل لك إيه؟؟


في حالة زي دي إجابتك محكومة بالخريطة اللي عندك.. اللي هي خبراتك وتجاربك..


في السؤال الأول:
لو عايز تخطب حد أو مررت بخطوبة سعيدة, هتمثل لك: الفرحة والسعادة..
لكن لو كنت مررت بأزمة عاطفية مثلا, هتمثل لك: الألم والحزن.. يعني العكس تماما..


في السؤال الثاني:
لو في طفولتك دكتور الأسنان كان لطيف, أو حد بتحبه دكتور أسنان, هيمثل لك: الطمأنينة والارتياح..
لو مريت بتجربة سيئة أو والديك كانوا بيهددوك بدكتور الأسنان, هيمثل لك: الألم والخوف...

نفهم من كده إن تجربتك الشخصية (خريطتك) حكمت نظرتك للعالم وللأشياء... وكل واحد أكيد عنده تجارب (خريطة) غير التاني... فالإجابة مش هتكون واحدة عندنا كلنا.... يبقى ببساطة: الخريطة بتاعتك مش شرط تكون صح.
قاعدة مهمة


الخريطة ليست صحيحة دائما!!


يعني لا تثق إطلاقا في الخريطة اللي عندك.. واسأل نفسك دايما: هل هي خريطة صحيحة فعلا؟؟ هل تصلح للزمن ده؟؟ هل تأكدت إنك قمت بتحديثها؟؟ هل بتتوافق مع خرائط الناس التانية؟؟

الخرائط دي اتكونت عن طريق تجاربنا والمعلومات اللي حصلنا عليها طول سنين حياتنا... عن طريق:

الوالدين والأسرة
المدرسة والجامعة
المجتمع المحيط
وسائل الإعلام


لكن للأسف لا يجب الثقة في هذه الخرائط لمجرد إنها الخرائط بتاعتنا ولمجرد إننا اتعودنا عليها.. مش كده؟



يعني لو الواحد كبر لقى أبوه وأمه بيدخنوا... غالبا هيكون مدخن...
لو اتربى على عادات غذائية سيئة....... غالبا هيفضل يمارسها...
لو اتضرب في المدرسة بقسوة.... ممكن يمارس نفس الأسلوب مع أولاده...


فدايما اسأل نفسك.. هل الخرائط دي صحيحة؟؟؟
هل عشان اتعودنا عليها والناس حوالينا برضه.. تبقى صح؟؟

مافيش حد بيعتبر نفسه غلط.. لكن الخريطة بتاعته هي اللي غلط وهو ماشي عليها..



القاتل.. خريطته: أنا ريحت العالم منه.. أنا عملت خير!!
الحشاش.. خريطته: ده نبات طبي.. تاخد نفس يا كابتن؟؟
الحرامي.. خريطته: أنا باسرق عشان أحوش قرشين ينفعوني!!



وطبعا واضح إن كل الخرائط اللي فاتت غلط تماما ومش صحيحة خالص.. مش هتلاقي حد بيقول: "أنا عملت الجريمة عشان أنا شرير..".. هو ماشي بخريطته وفاكر إنها صح, لكن هي غلط زي ما شفنا..


عرفت بقى إن مهم قوي نراجع خرائطنا؟؟

راجع خريطتك أول بأول.. وقارنها بخرائط الناس اللي إنت شايف إنهم أحكم وأكبر منك.. قارنها بخريطة قدوتك..


راجعها من وقت للتاني عشان تتأكد إنك مش ماسك الخريطة بالمقلوب....
إتأكد دايما إنك ماسك الخريطة الصح بالتاريخ الصح وبالوضع الصح..
ورحلة حياة سعيدة.






خرائط الناس التانية


عمرك اختلفت مع حد ف موضوع معين وحسيت انك انت الصح وان هو الغلط؟؟
شايف الناس مش مقتنعه بافكارك وحاسس ان معظمهم مبيفهموش؟؟

طبعا الأمثلة كتير عندنا كلنا..




هاحكي ليك حكاية قديمة قوي..

مرة ثلاثة عميان دخلوا أوضه فيها فيل.. وطبعا عشان مش شايفين, قعدوا يحسسوا على الفيل.. واحد مسك الخرطوم, التاني مسك الديل والتالت قعد يحسس على رجله...

وجه واحد سألهم: إيه هو الفيل؟؟

الأول قال: الفيل ده يشبه الثعبان بالضبط..
الثاني قال: لأ.. الفيل عبارة عن مقشة..
الثالث قال: ده كلام فارغ.. الفيل عبارة عن أربع عواميد..

خلصت القصة..!!


قبل ما تسخر من العميان دول وتستخف بسذاجتهم :
اسمح لى اسالك سؤالين :
ايه رايك ف لاعب كره القدم المفضل لك؟؟

تخيل لو سألنا جدك عن رأيه في نفس الاعب هتكون الإجابة إيه؟هنا غالبا هيحصل خلاف في وجهات النظر.. إنت معجب بلاعبك وجدك رأيه غير كده خالص..

يا ترى ليه الخلاف ده حصل ومين فينا اللى صح؟؟

بعد ما عرفنا في الحلقة اللي فاتت إن (الخريطة ليست صحيحة دائما!) وإن كل واحد مننا له خريطة مختلفة عن التاني تماما.. ممكن إنت نفسك تفسر الخلاف اللي حصل بينك وبين جدك في موضوع لاعبك المفضل..

كل واحد عنده خريطه غير التانى :

الخريطه بتاعتك:
اللاعب ده أنا باحبه من أول ما ابتديت أتفرج علي كره أساسا.. وهو لاعب ناجح وجميل!!

الخريطه بتاعت جدك:
في شبابي كنت باحب لاعب من أول ما ابتديت اتفرج علي كره أساسا.. وكان ناجح وجميل.. لكن بتوع اليومين دول مش زيه خالص!!!أقول لك حاجه؟ لما تكبر في السن هتفضل تحب اللاعب ده لأنه بيفكرك بأيام الشباب.. ولو حفيدك سألك عن لاعبه هو المفضل, عارف رأيك فيه هيكون إيه؟
نتعلم من كده إيه؟ نتعلم من كده قاعدة مهمة جدا,

وهي:يجب احترام خرايط الناس التانية..

لا تفترض إن خريطتك هي اللي صح وإن خرايط الناس التانية هي اللي غلط.. ماتعملش زي العميان اللي في أول المقالة.. احترم خرايط الناس التانية وحاول تعرفها.. عشان تقدر تشوف الفيل كله على حقيقته..

عايزين المرة دي بقى نعمل التالي:


اكتب خلاف حصل لك مع أي حد.. وقول الخريطة بتاعته والخريطة بتاعتك في الموقف ده..

الخريطة هنا ممكن تكون حاجه زي: تعليمه كده - اتربى على كده - خلفيته كده - مر بتجربة خلّته كده....... إلخ
حلو الكلام؟؟




كيف تتكلم مع الناس؟؟


عنوان غريب مش كده؟؟

سؤال:
عمرك لاقيت إنك مش عارف تتواصل مع حد معين؟؟ رغم إنك فعلا عايز تكلمه؟

لاقيت مرة واحد مابتحبش تتكلم معاه خالص؟؟ كده لله في لله؟؟
هل مرة لاقيت إنك مش عارف تبيع سلعتك للزبون بتاعك رغم إنك حاولت بكل إخلاص؟

أكيد أيوه.. مش كده؟


طيب.. هنتكلم النهارده عن حاجة من الحاجات اللي هتفيدك في التواصل مع الناس بصورة أفضل.. والحاجة دي اسمها (التحدث بإيجابية)..

في البداية عايز أوضح لك حاجة مهمة جدا عن عقلنا اللاواعي..

هنعرفها من المثال الصغير ده:
مثال:


هاقول لك جملتين عايزك تركز فيهم قوي وتنفذ اللي فيهم:

ماتفكرش في وردة حمراء!!

ها ها ها.. ينفع؟


طيب خد دي كده:
ماتتخيلش سيارة سوداء!!
ها؟ خدت بالك من اللي حصل ده؟؟ أكيد أكيد فكرت لا إراديا في الوردة الحمراء وفي السيارة السوداء كمان..

إيه اللي حصل ده؟
اللي حصل يا جماعة إن العقل اللاواعي بتاعنا مابيسمعش الكلام قوي..

ببساطة بياخد الجملة ويقعد يفكر فيها كلمة كلمة عشان يقدر يستوعبها..

فعشان تفهم الجملتين اللي فاتوا كان لازم العقل اللاواعي بتاعك يتخيل الوردة والسيارة السوداء!



يعني إيه؟؟ يعني لو عايز أأثر على العقل اللاواعي للشخص اللي باتكلم معاه, ومش عايزه يفكر في وردة حمراء.. يبقى لازم الجملة مايبقاش فيها وردة حمراء.. صح كده؟؟

طبعا المسألة مش مسألة وردة حمراء وسيارة سوداء..
عشان تفهم قصدي اقرا الأمثلة دي:

مثال:

البائع: الأسعار بتاعتنا مش غالية.. احنا مش حرامية ونصابين!

الجملة دي غلط تماما وهتأثر في اللاشعور بتاع الزبون.. هيلاقي نفسه ببساطة (مش مستريح) للصفقة دي, ومش لازم يكون عارف ليه.. لكن احنا عارفين طبعا..

جملة (مش غالية) دي هيركز اللاشعور على كلمة (غالية) لا إراديا..

والجملة التانية (احنا مش حرامية ونصابين) هيفهم منها إنهم (حرامية ونصابين)!

يبقى المفروض البائع يقول مثلا: أسعارنا مناسبة جدا.. احنا يهمنا ثقة العملاء!

نفهم من كده إيه؟؟

نفهم إن إنت لو عايز تأثر في اللي قدامك بحاجة, يبقى لازم تستخدم الكلمات الإيجابية المناسبة اللي تخلق جو من الراحة في نفسه.. زي (رائعة) و(ثقة) في المثال اللي فات... واهرب من الكلمات السلبية زي (غالية) و(حرامية ونصابين) حتى لو نفيتها.. زي ما عرفنا مع بعض..


مثال:
الطبيب: ماتخافش.. الحقنة مش بتوجع خالص.

هه.. إيه رأيك في المثال ده؟؟

يلاّ مع بعض نطلع الكلمات السلبية:
أول كلمة سلبية هي: (ماتخافش).. دي هتخليه يخاف أصلا لأننا ذكرنا الخوف..

ثاني كلمة سلبية هي: (مش بتوجع).. دي هتخليه يتخيل الألم والوجع..

يبقى المفروض يقولها ازاي؟؟

الطبيب: اطمئن.. هتحس براحة بعد ثواني! (ملاحظ إننا ماذكرناش كلمة "حقنة" أصلا؟)


(ملحوظة: كتجربة شخصية, لكل الأطباء اللي بيقروا الموضوع ده.. التكنيك ده أفادني كتير جدا -كطبيب أسنان- في إقناع المريض بأخذ الحقنة..

تجنب الكلمات السلبية زي: ماتخافش- ماتقلقش– زي شكة الدبوس...

كلمه يا دكتور عن الراحة والشفاء وإن حقنة البنج مريحة لأنها حقنة بنج أساسا.. خدت بالك؟ ببساطة لأن هي دي الحقيقة, بس المهم هنوصلها له بأي طريقة؟).


مثال:

البنت لخطيبها: ماتقلقش يا حبيبي.. عمري ما هاخونك أو أكرهك!!!

طبعا كلنا حسينا بصدمة من الكلام ده.. لكن احنا عرفنا ليه..

عشان الكلمات السلبية زي: ماتقلقش- هاخونك – أكرهك!!!

المفروض الجملة دي تتقال كده:
البنت لخطيبها: اطمئن يا حبيبي.. أنا مخلصة لحبنا وهافضل أحبك على طول!!

شايف الجمال اللي في المعنى؟؟ مع إننا ممكن نلاحظ ببساطة إن الجملتين لهم نفس المعنى...

نستفيد من الكلام ده إيه بقى؟؟

نخش على الحكمة بتاعة التهاردة:

مهم جدا معنى الكلام الذي نقوله..
والأهم هو: كيف نقول هذا المعنى..
استخدم كلمات إيجابية دائما في حياتك..
ولاحظ الفرق الذي سيحدث في علاقاتك مع الناس..


واعرف الحقيقة دي..
الناس اللي بيستخدموا كلمات سلبية كتير في كلامهم, الناس بتبتعد عنهم ومش بتحب تتكلم معاهم..
افتكر حد مش بتحب تتكلم معاه..
يا ترى إيه السبب؟؟
بيشتكي دايما من الظروف؟
بيشتم كتير؟
بيثير الإحباط؟؟

ركز في كلامه هتلاقي الكلمات اللي قلنا عليها..
الكلمات (السلبية)..

على عكس الناس اللي الناس بتحب تتكلم معاهم..
فكر في واحد بتحب تتكلم معاه وبتستمتع بكده..
مبتسم؟
متفائل؟
بيهون على الناس اللي حواليه مشاكل الحياة؟

ركز في كلامه هتلاقي الكلمات اللي بنقول عليها:
الكلمات (الإيجابية)..

قبل ما نختم بقى تعالوا نلعب لعبة:
تمرين:


اختار الجمل والكلمات الإيجابية اللي توصل المعنى بصورة صحيحة, وحط قدامها علامه (صح).



أنا مش عبيط.. أنا فاهم كل حاجة
صح ولا غلط

خليك ذكي وركز معايا.
صح ولا غلط

الجو النهارده كويس
صح ولا غلط

يا باشا البضاعة بتاعتي مش بتعفن بسرعة!
صح ولا غلط

ماتقلقش.. الموضوع بسيط!
صح ولا غلط

هابطل السجاير, واكون إنسان جديد!
صح ولا غلط

البارفان ده ريحته مش وحشة خالص.. بالعكس!
صح ولا غلط

ماتفتكرش إن صحتي راحت.. أنا زي الفل.
صح ولا غلط

مش هاخذلك يا معلم!
صح ولا غلط

أنا إرادتي قوية جدا.. ثق في كده!
صح ولا غلط

ماتبقاش غبي يا بني.. فتح مخك معايا!
صح ولا غلط

أحبك!
صح ولا غلط

طبعا حليت الواجب كله لوحدي.. إنت فاكرني باكدب؟
صح ولا غلط


كفاية كده؟؟
حلها بقى بروقان واعرف إنت بقيت متحدث إيجابي ولا لأ.. مرن نفسك من النهارده على إن كلامك يكون إيجابي.. ولاحظ الفرق اللي هيحصل في حياتك...

ماشي يا جماعة.. حط بقى مرادفات (إيجابية) للجمل (السلبية) اللي فاتت لو حبيت.... وورينا شطارتك يا بطل..

فاعل مفعول به!!

فاكرين يا جماعة دروس العربي؟؟

الفاعل مرفوع بالضمة والمفعول به منصوب بالفتحة.. فاكرين الكلام ده؟

أيام ما كنت في المدرسة لفت نظري حاجة ظريفة قوي.. هي العلاقة بين الفاعل والمفعول به..

ملاحظين إن دايما الفاعل هو اللي بيكون متفوق على المفعول به؟؟

الفاعل دايما بيكون مسيطر والمفعول به غلبان وبيقع عليه الفعل وبس.. يا حرام!!

لاحظ كده مثلا الجمل دي:


أكل "أحمد" التفاحة..
"أحمد" هو اللي ماسك التفاحة الغلبانة وبياكلها.. مين المسيطر هنا؟؟

كمان مثال

ذاكر "أحمد" الدرس..

طبعا المسيطر هنا هو "أحمد"..
هو اللي ماسك الدرس وقاعد يقراه..
مين فيهم متفوق على التاني؟

إنت عايز تقول إيه بالضبط؟؟
هي حصة عربي يا عم إنت؟؟؟
لا مش حصة عربي..
دي مقدمة بس للكلام اللي عايز أقوله ليكم النهارده..

يا ترى إنت فاعل ولا مفعول به؟؟


هل أنت فاعل؟

عشان تكون ناجح في حياتك لازم تكون (فاعل) وليس (مفعولا به)..
كده بكل بساطة..

فيه ناس بتعتبر نفسها دايما (مفعول به) طول الوقت..
وناس تانية بتعتبر نفسها (فاعل) مهما حصل..
والنوع التاني ده هم اللي بيكونوا ناجحين في حياتهم..
عايزين توضيح أكتر؟

الشخص (المفعول به)


هو الشخص الذي لا يذهب لعمله لأن الدنيا بتمطر!
هو الشخص الذي يظن أنه دائما ضحية الظروف..
وأن من حوله وما حوله هم سبب شقائه وبؤسه..

أمثلة من مقولاته:

- أنا لو كنت في بلد تانية كان زماني نجحت.
- المدير بتاعي هو سبب تعبي.
- أنا رسبت في الامتحان عشان المدرس ما بيعرفش يشرح.
وغالبا الشخص ده بيكون فاشل..
لأنه مجرد مفعول به.


الشخص الفاعل:


هو الشخص الذي يحضر مظلة ليذهب لعمله لو الدنيا مطرت!
هو الشخص الذي لا تتحكم فيه الظروف، بل هو الذي يتحكم بها..
وأن أي عقبة في طريقه هي مجرد تحدٍ آخر له يجب أن يواجهه ليصل لهدفه..

أمثلة من مقولاته:

- أنا هانجح رغم كل الظروف.
- سأصلح علاقتي بالمدير الجديد أو أجد وظيفة أفضل.
- المدرس لا يشرح جيدا.. هذا يعني أن أهتم بالمذاكرة أكثر لأفهم الدرس.
ودايما الشخص الفاعل ده بيكون ناجح في حياته وبيصل لكل اللي هو عايزه..

حكمة:

يجب أن تؤمن دائما أن حياتك من صنعك أنت وليست من صنع الظروف التي حولك..
وأن العقبات وجدت في طريقك كي تواجهها وتتخطاها لا لتستسلم..

عشان كده لازم تؤمن تماما أن حياتك دي إنت المسيطر عليها تماما..
وإن إنت سبب نجاحك أو فشلك..

فكر في الموضوع من الزاوية دي: كل اللي بيحصل لك بسببك إنت, مش بسبب أي حاجه أو حد تاني..
إنت اللي بتصنع حياتك مش الظروف..

كفاية كلام عن الظروف والبلد والأقدار..
إنت اللي بتصنع حياتك وإنت اللي لازم تواجه مشاكلك وتحلها..
لأن ماحدش هيحلها ليك غيرك إنت...
لأنها –ببساطة– حياتك إنت مش حياة حد تاني..

علشان كده في أي موقف أو مشكلة تواجهك في حياتك اسأل نفسك السؤال ده:

أنا فاعل ولا مفعول به؟؟



كفاية عليكم كدة واستنونا الحلقة الجاية
[right]